Xoldra de Aguiar

Xoldra de Aguiar ten como principal obxectivo poñer en valor o mundo rural utilizando a cultura das festas populares como motor dun evento musical que se celebra durante todo un día, desde a sesión vermú ata a noite, incluíndo tamén programación infantil. Trátase dunha xornada cargada de convivencia, música e bo ambiente, que reflicte a boa disposición do público para gozar dun evento ao aire libre na contorna rural.

Na súa edición de 2023, os grupos galegos Lamatumbá, Brinkadelia Troupé e a agrupación Os do Fuelle foron os encargados de animar a festa, mentres que a animación infantil correu a cargo de A Run Run Xogos e Enredos. Na edición de 2024, animaron o evento grupos como Cé Orquestra Pantasma, Los Camachuelos, O Sonoro Maxín e, para pechar a xornada, Luar na Lubre.

Este ano, Xoldra de Aguiar regresa a Os Gozos, no Concello do Pereiro de Aguiar, e, como non podía ser doutro xeito, na hora da comida haberá unha pulpeira con diferentes opcións para todos os gustos. A música estará a cargo dunha banda tan mítica da nosa escena como Milladoiro.