Festival de Ortigueira

A edición de 2025 do Festival Internacional do Mundo Celta de Ortigueira estenderase do 9 ao 13 de xullo. Desde a súa fundación en 1978, a cita –que un ano máis conta co apoio dos Concertos do Xacobeo– converteuse nun dos eventos musicais máis multitudinarios de toda España e nunha cita ineludible do verán, así como nun dos referentes mundiais do folk e da música celta.

Nesta nova edición, o festival centrarase en atraer a grupos de referencia do panorama celta internacional, prestando especial atención, tamén, a novas propostas emerxentes da escena tradicional galega. No seu cartel, danse cita nomes como Ailá, Alana, Böj, Dervish, Backwst, Muro Kvartet, Fillas de Cassandra, Green Lads, José Manuel Tejedor ou Scotish Fish, entre moitos outros.