Boma Bango

Desde o corazón do Congo aos humidais de Luisiana… e directo a Holanola. O 19 de setembro, o escenario da Borriquita de Belém énchese de ritmos hipnóticos e reverberantes co directo de Boma Bango. A banda rescata e reinventa a rumba congoleña dos anos 50 e 60, inspirándose en lendas como Franco Luambo, Tabu Lei ou Docteur Nico, e a mestura co swing tropical do sur de EE. UU.

Guitarras trémolas, percusións envolventes e cancións cantadas en francés de Luisiana dan forma a un son sedutor, cálido e completamente irresistible.

Do 16 ao 21 de setembro, Santiago de Compostela acollerá a cuarta edición do festival Holanola Lab-Festival, unha celebración do jazz e a música contemporánea de Nova Orleans en diálogo con artistas galegos e de todo o mundo. O evento concluirá en Ourense coa CARAVANA NOLA, unha travesía musical polo sur de Galicia e o norte de Portugal na que músicos locais e internacionais viaxan xuntos, crean en roteiro e levan a música a novas paisaxes e xentes.