Maré Festival

O festival maré músicas e artes atlánticas regresa este 2022 a Santiago de Compostela do 21 ao 25 de setembro no marco do programa Concertos do Xacobeo. Nesta nova edición, a cita achegará ao seu público propostas artísticas vibrantes e diversas, chegadas dos dous lados do Atlántico. O festival busca converterse en referencia intercultural e de diálogo entre músicas e outras artes, na súa decidida aposta pola diversidade e o intercambio cultural entre territorios e sociedades que comparten lazos lingüísticos, históricos e sentimentais. maré é un proxecto artístico que avoga pola inclusión social, o feminismo e a sustentabilidade ambiental, para celebrar que vivimos nun mundo cheo de talento compartido. No seu cartel danse cita nomes como Capercaillie Symphonic & Real Filharmonía de Galicia, Guadi Galego, Barmer Boy ou Sofía Viola, entre moitos outros.