Baiuca

Baiuca é un dos maiores referentes da adaptación e renovación da música tradicional galega. Cun son que fusiona o folclore e a música electrónica, as súas creacións están a romper barreiras e difundindo a cultura galega alén das súas fronteiras. Sen dúbida é a punta de lanza de toda unha nova xeración de músicos en galego que están a tombar estigmas e romper récords.

Na programación musical do Xacobeo 21-22 presenta o seu novo espectáculo, acompañado da banda, no que será un directo inesquecible de celebración do primeiro ano de vida do seu impresionante ‘Embruxo’.

Revenidas expándese no marco do Xacobeo 21-22, no seu afán de afondar na promoción da lingua galega, e achega a distintas localizacións de Lugo e Ourense algúns dos espectáculos máis interesantes de artistas do país. É o caso de Baiuca, referente da folktrónica; Treixadura, banda de referencia da música tradicional e que está a celebrar o seu 30 aniversario; ou da proposta que Xabier Díaz & Adufeiras de Salitre achegarán a Celanova: inmersos na xira de presentación do seu último traballo, As Catedrais Silenciadas, convidarán a artistas amigos a subirse ao escenario con eles para acompañalos nun concerto único no que revisarán os temas máis significativos dos seus repertorios.